2012 向南半球出發, 澳洲之旅 - Brisbane 第五天, Lone Pine Koala Sanctuary

19 / 4 / 2012 , 晴天,  整個旅程, 天氣最好的就係今日~ 明天就要走了.....

無睇過樹熊, 點算黎過澳洲呀!!!
今次澳洲之行的主角當然係佢啦~

我選擇左去有130隻樹熊的 Lone Pine, 而沒有去我朋友推薦的 Currumbin ( 佢無去過 Lone Pine)
由於我見唔到有人兩個動物園都去曬, 所以無得比較......
Lone Pine 的感覺上好似無咁商業, 所以我選擇左佢~

去 Lone Pine 可以係市內的 Information Center 買定票先, 平兩蚊au架 !!!!!
佢地仲會比張巴士時間表比你, 教埋你點搭車tim~

其實個巴士站同 information center 都好近~
車費 :  au$6.2 (paper ticket ) , go card au$4.24, $3.4(off peak)
車程約半小時~




動物園唔算好大, 我見好多人話玩半日ok~
但係, 我比較慢, 玩左一天~ 10點去到, 玩到人地差唔多收工先走~

不過我建議都係早d去, 一開門 9點左右就好去到啦~ 咁就可以9:45am 餵到鸚鵡仔, 錯過左就要等到4:00pm 先再有一場架啦~

如果早d去, 3:00pm 就可以睇曬所有節目架啦~
自己上網睇 time table 啦~ 有d節目有重複, 有d無架~
http://www.koala.net/

友人話我知~ 澳洲d 樂園裡面食野都唔算太貴, 所以我地就無帶糧食入去~
但係, 原來 Lone Pine 入面, 只得一間食市的, 而且無咩選擇.......價錢比出面是貴少少的, 都唔算話好貴~
所以建議帶定份午餐入去會好d ~
我地黎左澳洲咁多日, 終於食左第一餐的 Fish & Chips 啦~

佢叫 Wombat 

係呢度, 最自由的, 應該是袋鼠, 佢地有好大個area 周圍走, 我地仲可以入去任摸任玩d 袋鼠~
好開心呢~
仲可以去買包糧餵佢地 au$2

終於可以好仔細咁睇清楚袋鼠個樣啦~

超多袋鼠呀~

後面幾個女仔, 頭先竟然敢瞓係個地下度~

我咁講除左怕比袋鼠踩親之外~ 而現場更是片地 "黃金" 的...........

袋鼠d金同羊的好似, 都係一粒粒細細粒, 好多好多的~~~~

前腳~

後腳~

好可愛呢 \( >.< )/

呢個眼神真係迷死人了~ 

無論是袋鼠, 定係樹熊, 個身都好似好痕咁, 成日都見佢地左 "r" 右 " r " 的??

不過佢地 " r " 痕個樣都好鬼得意

佢係男仔~

佢當然係女仔啦~

你留心睇下佢個袋 ~~
袋鼠bb 隻腳都好長下 wo~

 

睇到嗎 ?
不過我見唔到 bb 個樣呀~
又唔敢多手攪佢, 我怕媽媽會咬我~

淨係同袋鼠玩我都玩左成個幾鐘啦～ 如果時間多, 我仲可以玩耐d tim~
所以半日時間邊唔夠我玩架~


佢係Emu

佢都係 Emu, Emu 同d 袋鼠一齊住架~



呢度d四腳爬爬都非常自由~
無處不在的~ 佢會係你行行下的時候突然間跑出黎~

呢d鴨仔會走黎食袋鼠d野食架~

到左工作人員介紹小動物的時間,
佢現在介紹的, 是一隻BB袋鼠, 個照顧員一邊講, 一邊行得好快, 所以影唔到........
我基本上睇曬園裡面安排的所有活動, 只有爬蟲動物介紹我無聽到, 走左去食野~ 因為我唔鍾意蛇之類的動物....

睇雀仔時間～

 貓頭鷹真係好靚～

 

有無人知呢隻是什麼雞？
佢個爆炸頭好攪笑

 

隻山羊仔好得意^^
成日跟住人行～
仲咩野都食。。。。食我個袋、紙、衫。。。。。

牧羊狗表演～

呢隻狗真係好叻好聽話～


睇完牧羊狗表演, 之後睇剪羊毛表演, 個人覺得剪羊毛表演唔知有咩好睇.........


我想問下，佢係咪叫侏儒馬？ 定係驢仔呢？

在餵食時間黎睇佢，就一定見到佢啦～唔會瞓左覺睇唔到～
Tasmanian Devil
佢係食肉架!！仲連骨都食埋，真係有點可怕。。。。

 去睇 Tasmanian Devil 之前, 我地睇左鴨嘴獸, 不過因為現場太黑, 所以無影到相.......

鴨嘴獸住係個玻璃缸內的, 裡面好多樹枝、石等的東西, 而隻鴨嘴獸又黑又咁細隻, 如果唔係餵食時間, 可能未必會睇到佢~
當然我地都係等餵食時間去睇啦~ 可以見到佢食野 ~ 佢鍾意食蝦米仔架~

佢都係用肺呼吸的, 所以經常食食下野都要遊返上水面~

係時候比你地睇下今日的主角啦

呢度D樹熊真係超多～
我淨係睇D樹熊爬黎爬去都睇左好耐～ 好滿足呀～

佢係女仔～









佢係男仔～
你估下點分辨佢地係男仔定女仔 

 

我抱住的樹熊妹妹 叫  Jeffie 7歲大
呢張相當然要比$先可以影啦～
最平的要比AU＄16買一張相，跟住就可以再用自己個相機影～  ( 似乎用自己個相機影靚好多wo~ 應該請我地入去做影相啦)原來樹熊D毛毛係唔滑架 ！！有D 似羊毛～
反而袋鼠D毛滑好多wo ～


原來，唔洗比$ 都可以同樹熊影相架!!!.........仲可以摸，只係唔可以抱～
我抱完樹熊影相先知.......
佢每天都有兩場時間介紹樹熊的，介紹完之後，個姐姐就會抱住隻樹熊企係度，你地可以排隊同佢影相，唔洗$架!！
係啦～ 呢隻係男仔黎～ 個名我唔記得左lu~

最後的節目就係餵鸚鵡~

d工作人員會倒d 類似麥皮的東東係我手拎住個D 兜到, 你可以自己拎住黎影相, 影完插返上條木上面就可以~

但係, 我個頭係無野食的, 點解要走上我個頭度???

超多雀仔^ ^ ~ 不過現場超嘈......此地不而久留~

餵完雀仔之後, 我地行埋未睇的雀鳥區就走啦~

行雀鳥區的時候, 經過一籠白色大鸚鵡 (頭頂有幾條黃色毛的), 突然聽到 " bye bye " 再回頭望下~

真係鸚鵡同我地講野wo !!! 我企係度同佢講下野啦, 佢又同我地講 " hello" ^^

無諗過個籠裡面的鸚鵡會識講野~ 我估係d遊客成日都係個籠前面同佢地咁講, 所以就學識左啦~

搭車返到去都5點幾6點了~

我地黎左咁多日, 差唔多日日都見到 " Hungry Jack " 即是 " Burger King " (聽說, 因為 burger king 呢個名在澳洲已經有公司登記左, 唔用得~ 所以澳洲的 burger king 就要改名了~)

周圍都見到, 不過未幫襯過~ 所以今晚一於去食下~

原來呢度的 Hungry Jack,  汽水是可以自由免費添飲的 

如果需要上網的話, 呢度有免費一小時wifi上網, M記都有的~

明天要走啦~ 返去要執野啦~
 戰利品~ 特價au$2 一包, 超級市場買~

  帶唔到隻真的走, 唯有帶佢走啦~

回程我地要係 Sydney 轉機, 去到 Sydney 先話班機要 delay , 仲要遲成3個鐘.......
所以, 澳航送左張 au$30 的現金卷比我地, 在機場的餐廳用~

   加多5蚊食個生蠔, 其實應該比出面食貴左的, 不過有人請, 又見到佢即開的, 當然要試下啦~

我黎左咁多日澳洲都無食過~
細細隻但係好甜

 呢個就唔多抵食......au$30 的 "板長"
水準好一般....... d  wasabi 又無味......茶都無一杯比你飲......

 Sydney 個機場無咩野行, 仲要d野貴過其他機場好多......

呢3個鐘都幾難過.........其實等左唔止3個鐘.......

好啦終於可以上機啦~

上左機之後, 架機行左兩步出去, 又走返轉頭 !!!! (呢個場面似曾相識的 !!!! 咪就係出發的時候又係咁law.....)

原來係因為架機有個機門好似有d問題, 要工程師上黎睇下先........

又等多半個鐘多d.......

幸好, 旅程中, 架機都好定~ 安全返到香港~

不過, 原定我地是11:00pm 返到的, 現在, 差唔多 1:00am 先到~  ( 點解遲左差不多4個鐘起飛, 到達的時間只係遲左兩個鐘的呢????)

澳航都安排得很好, 佢地知道呢個時間, 無車出市區, 安排左旅遊巴比我地出旺角~ 我地再由旺角搭的的返屋企啦~

( 我都係而家先知原來呢d時間, 係無 N 車由機場開出去 !!!! )

澳洲係我小時候夢想去的地方 (因為小時候我的志願是成為一位獸醫, 所以想去澳洲讀書.....)

不過, 夢想不能實現.......

到長大, 出黎做野之後, 有個錢了, 可以自己去旅行~ 不知為何, 去了幾次都旅行, 都一直沒有去到澳洲 ??? 真奇怪 ???

今次終於到訪過了~

呢個真係一個幾好的地方, 我諗會是一個我想住的地方!!!

我喜歡呢度的人、動物、環境~

好希望可以再黎多幾次~

我今次的旅程, 就這樣完結了~

又要返回現實, 努力工作了............

計劃一次旅程, 真係花費了不少心機, 不過我是樂在其中的~  (有未出發先興奮的感覺 !!! )

返到黎寫遊記的時候, 又再次回味旅途中的細節~

去兩個星期的旅行, 可以興奮左差不多一年的時間, 真係抵 

希望我呢幾篇的遊記, 真係可以幫助到, 正在計劃去澳洲旅行的您啦~

謝謝觀看^ ^