Art Square: 2013 重遊北海道雪祭之旅 - Day 1 支笏湖冰濤祭@丸駒溫泉旅館

15/2 第一天

我地到達新千歲機場後, 立即搭 JR 去千歲駅

支笏湖冰濤祭 今年於 17 / 2 / 2013 就完,
為左趕及去睇, 所以我安排了在行程第一天前去~

北海道很多雪祭的場地都 "山卡啦" 咁遠的, 唔識自駕的人, 要去真係有點麻煩.....
我諗其實好多雪祭都係d 溫泉旅館的宣傳策略,
因為, d雪祭場地, 大多都近住d 溫泉旅館的~

唔識自駕的人(我) 只好, 住返幾晚溫泉旅館, 目的就係為左貪佢地的免費送迎~~

今晚, 我 book 左 丸駒溫泉旅館 : www.marukoma.co.jp
佢地有 札幌駅 及 千歲駅 的免費送迎~
為左慳車費, 我選擇左千歲駅接我地~~
因為機場去 千歲駅 只是一個站的距離, 車費只需 340 yen

明天, 就送我地去 札幌駅 走~ (慳左由機場去札幌的車費 )

酒店的送迎車, 14:45 接我地
我地大約 13:30 左右到左 JR 去千歲駅 ,
搵個地方醫肚先~~~~

搭左咁耐飛機, 好肚餓, 所以一見到食店就走左入去食了~

呢間餃子拉麵店, 都ok wo~ (可能我當時好肚餓啦~)

位置 : 一出JR 站巴士站位置, 行過對面馬路就是

d 餃子又幾好食wo~ 皮很薄很脆的~ 細細隻一啖食晒一隻

老公申請左張日本上網用的 sim 咭,
原本打算用佢部 "三叔 4g note" 的, 再 share 個 wifi 比我用~
點知, 唔知係唔係 4g 同 3g 的問題, 部 "三叔" 用唔到......
只好試下用我部 "埃瘋4"
用緊 "埃瘋" 的朋友都知, 如果要換 sim 咭, 係需要用支針拮佢出黎......
我地身上無針wo~ 點算呢??

咦 !!! 你望下牆上面~~~~
幾多圖釘 !!!
好彩我地黎左呢間店食野ja~
終於攪掂個上網用的電話~ 可以開地圖啦~

不過原來 block 左唔可以share wifi......

夠鐘, 就返去酒店車的接送地點上車~~

車程都要成個鐘架.........

架 van 仔在佈滿雪、彎彎曲曲、高高底底的山路上面行, 其實都幾驚

.......
好驚佢轆落山.......
都要相信當地司機叔叔的經驗gei~

到左旅館~~
感覺舊舊的......
呢間係我地整個旅程中, 第二貴的酒店~ (22000yen 二人一晚)
(係呢度提一提第一次住溫泉旅館的朋友, 日本的溫泉旅館是要收入浴稅的 150yen 一位, 無論你浸唔浸溫泉、一日浸幾多次, 只要住溫泉旅館就要比~ 所以總數應該是 22000 yen + 300yen = 22300 yen )

想不到, 這麼貴的價錢, 會這麼舊.....
衣櫃門是爛爛的....
(其實之前睇過有 blog 友提過啦~ 所以其實是有心理準備的)
而整體評價都是ok架! 放心啦~

旅館的服務是不錯的~
帶房的員工, 入到房間會先替我們泡茶, 之後介紹房間的設施~
晚餐是送入房間食的 ( 我第一次享受有人送上房的酒店晚餐

)

食完飯之後, 就有人入黎幫我地執房, 鋪床~
( 和式的房間, 晚上會將d枱搬埋一邊, 張床鋪在他他咪上瞓的~)

間房唔算好大, 不過我覺得ok 的~
沒有浴室, 所以就算你唔浸溫泉, 都要去大浴場沖涼架~~

溫馨小提示:
冬天去日本旅行, 室內都會開暖氣的, 雖然好溫暖, 但係也會好乾~
我通常每晚都會用手洗衫(底衫), 薄的底衫, 一晚就可以乾曬~~ (想像下自己個人, 一晚都可以抽乾曬.......)
這樣, 可以增加房內的濕度, 二來可以減少行李, 就算去十日我只需要帶兩件底衫就可以

如果你唔洗衫的話, 可以整濕條大毛巾, 晾係房度, 增加房內的濕度~~
(厚厚的大毛巾, 一晚都可以乾曬!!!!

)

浴衣、毛巾、牙刷等的用品~
很喜歡那個摺成星星形的腰帶 ^^ (其實本來是五角形的, 係我自己加工成星星形

)
住左三間溫泉旅館, 最喜歡呢間的浴衣, 因為女裝的是粉紅色的

安頓好, 我地就立即去大浴場泡個溫泉先~
有露天、室內的溫泉,
先在室內浸熱左個身, 再出去試下落住雪黎浸~
落住雪的感覺, 都幾有趣架~
但原來現場係會煙霧迷漫, 其實唔多睇到風景的........

(跟我原本想像的意境有點不同.....)

浸完~ 我地的食物已經送到房門啦~
成枱都係 ^^ 好豐富

好好味~~~
仲有飯同埋甜品無影到 tim~
雖然每碟都好細碟, 但係加起來, 都好飽~~~

唔好怪我大鄉里出城~
我真係第一次食紙火鍋, 所以覺得很有趣^^

食完之後, 好飽~~~
本來想將個甜品放入雪櫃, 留返今晚睇完冰濤祭先返黎慢慢食,
點知, 打開個雪櫃.........

個雪櫃分左好多格細細格的櫃桶仔的!!!! 每格只放到一罐打橫放的汽水.......
個甜品杯太高........放唔入..........
只好飽住的, 食....埋....佢..........

旅館只有兩班車, 接送我地去冰濤祭會場 (無料的)
第一班好似係 5:00pm , 我地約左另一班 19:45 的
車程大約都要15mins
20:45 就會開車接返我地返去~
o下!! 咁咪得 45分鐘行, 好趕??!!! (我地當時咁諗.....)

原來個會場好細的, 45分鐘是足夠的,
而且在零下 -6度的室外環境, 行45分鐘已經夠了~~

一落車~
我件羽絨就出事了......
條拉鏈爛左.........T_T!!!
所以之後的整個旅程, 我都係打開住件羽絨的.....
好彩都著夠衫, 唔算好凍, 仲頂得住......

在冰濤祭會場, 我地只係影左好少相, 呢張已經係最見得人架啦.....
(見到個月亮嗎??)

因為每次拍照, 都要拎出勇氣, 同埋要快速~~~

要拍照, 先要脫下手套, 脫左手套, 手的溫度就會急速下降....
連拍幾張後, 隻手就要立即 "差一差電" , 暖返先再影.....
係咪我地特別怕凍呢??
點解我覺得, 好似得我地先係咁攪笑的呢....??

大朋友跟小朋友爭野玩

冰滑梯好好玩!！

小朋友可以用好多花式滑落黎，利害!！

冰封了的魚！？

得 -6度炸!!!

d 雪加埋d 彩色燈又幾靚 gei~
有冰滑梯可以玩, 好多小朋友玩得好開心~
hehe ~~ 我都有玩^^

返到旅館, 我地又浸多次溫泉啦~
不過, 今次唔係去大浴場 ^^
我地 book 左的是 "夫婦xxxxxx" (日文) 的住宿優惠, 附送 50分鐘的貸切風呂
貸切風呂 - 即是出租的溫泉浴室, 間房呢個時候是私人的, 唔會有其他人一齊浸~
大浴場就唔影得相啦~
貸切的, 就可以影比大家睇下~
不過, 當然沒有出浴照睇啦~~~~~