2014 澳洲 My dream Harp豎琴工作室之旅 5 --- 豎琴之家生活體驗

28/9 (日)

大清早乘搭 7:11am 的火車前往 Grafton 小鎮, 正式開始我的 dream harp 製作之旅~

車程 10hr , 係10個鐘呀!!!! 諗起都想死 (ㆀ˘･з･˘) 

原本打算在車上畫下畫, 寫下文章 ( 7月去北海道的遊記...仍在停滯中....)

可惜, 做不到...........

因為火車唔夠定, 我有點暈車@_@

(我平時搭巴士時唔可以睇書或者電話, 因為會暈.....)

咁只好欣賞下沿途風景啦 (๑•̀ω•́)ノ

沿途的風景不錯架~

但10個鐘大部份時間都係呢差不多的景........

幸好, 睇戲都尚可以 (・ω・)

睇左兩套戲, 食下野, 瞓左一陣.......

終於到 Grafton 了~

其實仲未到師傅的屋企架~

仲要多半個鐘的車程.......

因為無公共交通工具到達, 所以要麻煩師傅的太太駕車來接我地!

真係好感激佢地呀 ヽ( ^ω^ ゞ )

因為我地從外地黎, 有好多生活上的野都需要麻煩佢地幫我準備!

點解我咁講呢~

因為所有的參加者都是當地(澳洲)人, 全部都係自己駕車黎的,

佢地有旅行車, 所有生活所需都可以自己帶去!

因為影左太多相啦 XD

應該一篇是不夠寫的, 估計要分 3 至 4篇!!

第一篇, 我先同大家介紹下呢度的環境及生活吧!

我覺得今次除了可以親手製作我的愛琴之外,

也賺了一個難得的生活體驗! 

(我之前都有住過澳洲的farm stay , 住一晚都唔平架!! 有興趣可以睇返我之前的澳洲遊記)

(而家, 加送 7晚 farm stay , 仲唔抵返曬!!?? 雖然無咁多動物睇~)

仲過了一個星期非常健康的生活!
簡直有洗滌身心的感覺!!! (好似有點誇 !!)

周圍綠油油一片,
每天呼吸的都是新鮮的空氣 <(￣︶￣)>
無電視(其實有, 但未見過有人開~) ,
無電腦 (我有帶個pad 不過網絡接收超弱.....)
晚上有滿天星星相伴 ヾ(*´∀ ˋ*)ﾉ
早上處處聞啼鳥~~

唔知有幾多年, 未試過早睡早起了~ 10:00pm 睡, 6:00am 起身 (ﾟдﾟ)
早上仲要係自動醒的, 唔洗鬧鐘! 都可以話係比鳥兒嘈醒的~

原來早睡早起, 真係會精神好架 !!!

可惜, 香港的生活.....做不到......OTZ

介紹下 Grafton City 呢個地方

這裡的人口只有 2百幾人!!

社區生活配套都算完善, 有超市, 各式商店, 小學(全校只有20多個學生的小學!!!)

不過全部都好分散, 出入自己無車真係唔得~ 

去超市買條菜都要駕半個鐘車去~

當地人應該不能想像, 香港的生活是何其方便 XDD

昨晚無意間見到一篇同 Grafton 有關的旅遊介紹~

"紫迷不可不知的事!秋份,只能賞楓!?有想過沐浴在紫色雨下嘛?告訴你一個旅遊書不會介紹的賞藍花楹景點!"

其實我之前在火車的官方網頁上, 都見到有當地景點介紹, 已知道春天可以見到咁壯觀的紫色花, 可惜, 未到花期, 看不到......

介紹我師傅比你地認識~

右手邊好和藹可親的就是師傅 Geoff 同佢太太 Annie

Thank you Geoff and Annie!! 

Thanks for your teaching, let me can make my own dream harp!

Thanks for we have a wonderful time in your lovely house! 

Thanks for your delicious food, Annie!

Thanks for .............too many thanks, I don't know how to say!

我答應左, 返黎寫好篇遊記之後, 會比佢地睇!

不過我都講左, 我英文唔好~ 只會寫中文 XD

仲有要多謝我老公!

 My tent, I have a good sleep here!

呢個係我地的帳篷, 係師傅幫我地整架 (我之前講左話我唔識整)

因為租帳篷比住附近的民宿平好多, 為了節省旅費~

其實, 我咁大個女, 今次係我第一次露營!!!
之前都有點擔心自己會瞓唔慣, 怕有蟲蟲.....

結果, 我幾晚都瞓得好舒服~~~

咁都係要多謝師傅!! 

佢地幫我舖左一張厚的床褥 + 床褥墊 + 一個睡袋 + 床單!! Σ( ° △ °|||)︴

再加一個睡袋當被~
(我最後果日幫手收起個帳篷先知佢原來舖左咁多野比我 ja!)

(應該係因為我在信中提及我未試過露營, 佢地擔心我瞓得唔舒服啦!!!)

**留意, 原本係唔包睡袋, 床等的物資架!!!! 佢地的報名表上寫左要自備架!!

**露營的費用原本只係包 一個 帳篷 同埋在屋入面沖涼~

而且佢仲安排我地個帳篷在最近屋前面的位置tim~ (佢又知我怕黑 gei !!??)

其他的參加者, 住得遠少少, 佢地自己有帳篷, 有d就瞓車入面~

最後一日幫手收拾帳篷後,

比我地瞓左7 日之後的草...... 黃晒...!!!

唔洗怕蟲蟲的問題~

呢度天氣乾爽, 蟲蟲唔算多~

蟻、飛蟲、甲蟲、蜘蛛就一定有架啦~ (我仲見到隻大的蜘蛛tim~唔理佢就無事~)
有手尾, 拉好d 拉鏈, 就唔會走入帳篷入面架啦~

咁蚊呢?.?

問得好~~~

豎琴工作室一年只辦兩次, 應該是有原因的~

一次在春天, 另一次是秋天 (應該是最舒適的季節)

師傅話, 天氣熱, 才會有蚊, 

所以呢幾日, 我完全無比蚊釘過!!!

加上, 呢度無冷氣架 !!!!! 夏天來上堂? 一定熱死!!!

冬天? 露營一定凍死啦~

呢兩朵 Iris

係正我帳篷的門口, 我睇住佢開花, 陪左我7日,

到我走果日, 佢謝了....

好難先可以同時兩隻狗仔一齊合照,

要一齊望鏡, 更難... XDD

比我地參加者專用的雪櫃~

好似係附近經營民宿的姨姨畫的~

早餐的位置~

每朝早望住咁靚的自然環境食早餐,

真係會精神d !!!!

早餐, 晚餐都要自備~
所以要買定一星期的食物入黎!!!

早餐, 我買了 麵包、可可米、牛奶、芝士、朱古力醬

晚餐

公仔麵、烏冬、橋麥麵、急凍什菜、牛肉粒、火腿、番茄等~

(靜雞雞話你知~ 師母比左d 雞蛋我~其他人無架~ 唔好話比人知呀!!)

佢都係帶我去超市時, 見到我去買雞蛋先同我講,

佢有好多可以比d我~

(因為佢地有自己有養雞~)

煮食方面:

佢準備左個位置, 在屋外的, 比我地參加者煮食用~

不過, 我唔識用佢地呢種 gas 爐, 

所以請求佢比我在屋入面煮

咁我都識做的!!!

去人地屋企住, 都要有d貢獻的~

所以我準備了港式的糖水比佢地試~

我整左應該係最易煮的---

椰汁西米露 + 水果粒

又無意中發現佢有綠豆,

原來佢唔知可以點整黎食!!

我就煮了一個無陳皮的綠豆沙~ (都好食架~)

有無人可以教下我 

"椰汁西米露" 、"綠豆沙" 的英文應該點講???

我真係唔識........
你估下我當時點介紹 !!??
(有人回應教我的話, 我就話你知~)

食午餐的位置

Lunch !! Taste good !!! Thanks Annie!!

午餐  (d人未到齊, 人齊的時候, 又唔記得影合照....)

需要於報名時預訂 (費用自己問下, 因已改價錢)

每天的午餐大約差不多,

有沙律、麵包、肉、意粉/飯 

(原來佢地都鍾意食飯, 味道就~~都係電飯煲煮得好食d)

其他食物都好新鮮, 好好食!! 

呢度9人份量, 由師母一手包辦!! 勁呀!!

(如果你地去, 又想送份回禮比佢地, 可以諗下電飯煲~)

佢地養左好多雞~

好肥美的, 走地雞呀!!!

呢度好環保架!

人唔食的果皮, 用黎餵雞~

唔要的湯汁, 就咁到落地, 做肥料!!

唔食的骨、肉, 比狗食~

動物在泥土上便便, 做肥料!

解決了很多垃圾問題!!!

天然的肥料種出肥大的果實!!!

d 檸檬仲大隻過橙!!! 

認住呢d樹! 樹熊最愛的樹!!

桉樹（Eucalyptus）又名尤加利樹

呢度周圍都有, 

呢度有野生樹熊架!!!

不過, 我無緣, 見唔到....

但每晚都聽到佢地叫!!!

好似豬叫咁一d都唔好聽......仲有點恐怖....

第一晚黎到的時候, 師母同我地講, 

晚上會聽到一d好可怕的聲音, 唔洗驚架!
係樹熊叫~

因為呢排係佢地的求偶期, 所以會咁叫~~

我 : 樹熊!! (雙眼放光!!!)

之後, 我每天都四圍望d樹, 但都見唔到~

每天的工作時間是 8:00am - 6:00pm

佢地的休息時間安排得很好, 所以做起上黎, 完全唔會覺得辛苦
(但有同學仔話辛苦架~)

10:00am 會小休, 大約半小時, 有免費茶點供應

1:30pm 左右吃午飯, 食飯時間差唔多2小時

成3點幾先再開工, 做到6:00pm

證明了, 有適當的休息, 工作會輕鬆很多, 生產力自然提高!!!!

每晚收工, 食完飯之後 都有 Musical Night ^^

Geoff 真係好勁 !!!!

多才多藝!

又識整豎琴, 又識彈豎琴

仲識彈結他!! 

佢屋企仲收埋左好多樂器, 我估佢都應該識玩!!!
佢已經成為我偶像了~~

師傅身邊的係另一位參加者

呢個叔叔同太太一齊黎,

太太是 豎琴手, 因為想要多一部細琴26弦, 佢黎整個琴送比太太!!

太太仲帶埋自己部豎琴黎玩 (36弦)

咁大個琴都可以經常搬出街玩~~利害! 

呢個世界, 仲有好多好老公架~

仲有一個係自己隻身黎整豎琴送比太太!

佢仲要整 36弦!! 勁呀!

(整36弦的參加者, 必須要有木工經驗!!)

星期五晚, 我地到附近的民宿開 party ^^
(如果選擇住民宿的話, 就係黎呢間住~ 雖然話近, 但都要行一段路架~)

我係晚上去的, 下面的相是同學仔send 比我架

彈緊琴呢位, 係其中一位參加者

佢整一個26弦小豎琴

因為佢想要一個可以方便帶出街玩的樂器

大家食下野, 傾下計~

各人都會表演下或者有d分享

其中一位太太, 今年有去 Sydney Harp Congress 2014,

所以帶左d 相, 同一d 偷拍的片段同我地分享!!

(佢話現場係唔比拍片架!! d片段係偷偷地拍的!!!)

大家圍埋一齊彈琴唱歌~
非常 enjoy!

不過彈的都是老歌無返50幾歲, 都唔會識.....

所以我無首識唱...

有一日, 師母突然提議下午帶我地去河邊野餐~~
Picnic ~~ YEA!!!

第一次體驗外國人的野餐, 好新奇呀!

好開心呀!
We enjoy picnic!!!

 好羨慕澳洲人可以咁自由奔放

著住衫直接就跳落河游水, 唔洗換泳衣!!!

我地d 城市人, 真係未試過.....也無勇氣試.....

有一天早上,

Geoff , Annie 帶左我地去行山晨運

呢個係人工的儲水池~

要自己比$ 起架!

起左之後, 屋企就唔洗交水費啦~

仲有電呢, 

佢屋頂有太陽能板, 電費都唔洗比~

(我問過啦~ 單是太陽能板係唔夠供應全屋的電架, 都仲需要買電....)

好似係人地屋企種的,

唔知咩花~

全白色的~ 好靚~

唔知咩樹, 個樣好古怪.....

因為太多相了~
下一篇介紹下放滿豎琴的屋企~